Gastronomia Zientzietako doktorego-programaren xedea da gastronomia-zientzien alorrean arituko diren etorkizuneko ikertzaileak prestatzea, goi-mailako sukaldaritzako profesionalen eta enpresa-sektoreen jakintza transferituz, bai eta gastronomiarekin zuzenean edo zeharka lotutakoa ere: elikaduraren teknologiak, nutrizioa, elikadura funtzionala, nekazaritza eta elikagaigintzako ekipamendua eta abar, horien arteko sinergiak sustatuz. 

Basque Culinary Center Mondragon Unibertsitateko Gastronomia Zientzien Fakultateak uste du beharrezkoa dela Gastronomia Zientzietako doktorego-programa bat antolatzea, bertan ikasleak ikerketa-tresnak barneratu eta erabil ditzan, sektorearen edozein alorretan aurrera egin ahal izateko.

Programaren oinarria AZTIren, Neiker-en eta BCC Innovation-en arteko lankidetza-hitzarmen bat da. Hiru erakunde horiek hartu eta zuzenduko dituzte doktorego-tesiak beren ikerketa-lerroen esparruan. Gainera, Kopenhageko Unibertsitateak ere parte hartuko du.