Nazioarteko sukaldarien batzordeak Donostian bilduko da, urriaren 20tik 22ra, GOe – Gastronomy Open Ecosystem inaugurazioan parte hartzeko, ‘Talaia’ Kongresuaren parte izateko eta hurrengo Basque Culinary World Prize-eko irabazlea hautatzeko.

 

Talaia topaketa bat izango da, gastronomiatik itsasora begiratzera gonbidatuko duena eta, hainbat diziplinatako profesional handiekin batera, sukaldatzen dugunaz, jaten dugunaz eta horrek gure inguruan sortzen duen eraginaz eztabaidatzeko aukera emango duena.

 

Donostia, 2025eko uztailaren 2a

Basque Culinary Centerren Nazioarteko Kontseilua, munduko chef ezagunenetariko batzuek osatua, Donostian elkartuko da berriro, urriaren 20tik 22ra, gastronomiaren irismenaz aritzeko hainbat jardueren bitartez.

Topaketa urriaren 20an hasiko da, berrikuntzan eta sektorearen etorkizunean oinarritutako esperientzia murgiltzaile batekin, GOe – Gastronomy Open Ecosystem-en, eta ondorengo inaugurazio instituzionalarekin, agintari garrantzitsuenek gidatua. GOe proiektu estrategiko bat da, gastronomiaren arlotik etorkizun goxo bati laguntzeko asmoz sortua. Horretarako, ikerketa, ekintzailetza eta goi-mailako prestakuntza bultzatzen ditu, talentuaren, ezagutzaren eta berrikuntzaren bidez, sektorearen erronka nagusiei aurre egiteko. Bere egoitza, Bjarke Ingels arkitekto ospetsuak diseinatutako eraikin ikonikoa, etapa berri honen ikur gisa altxatzen da.

Ondoren, Talaia, publikoari irekitako ekimena izango da, eta urriaren 22an egingo da ere GOe-n. Gastronomiatik itsasora murgil egitera animatzen gaituen eta jaten eta kozinatzen dugunari eta haren inguruko guztiari buruzko eztabaida sustatzen duen topagune berezia izango da. Oraingo honetan, Nazioarteko Kontseiluak, mundu osoan ospetsuak diren chefekin batera eta zenbait diziplinatako eta erakundetako profesionalekin batera, horizontera begiratuko du, eta bide berriak esploratuko ditu etorkizuneko gastronomiarentzat, ideia eraldatzaileen artean nabigatuz eta iraganera begiratu ondoren aukeraz beteriko etorkizun berri bat eraikitzeko helburua duten proiektuak partekatuz.

 

Aurten, Basque Culinary Center bere Nazioarteko Batzordearen anfitrioia izango da hirugarrenez, Donostiaren bihotzean dagoen espazio berri horretan. Figura handi batzuek osatzen dute kontseilua; hona hemen haietariko batzuk: Joan Roca (Espainia), Gastón Acurio (Perú), Yoshihiro Narisawa (Japonia), Manu Buffara (Brasil), Pía León (Perú), Elena Reygadas (Mexiko), Trine Hahnemann (Danimarka), Thitid Tassanakajohn (Thailandia), Josh Niland (Australia), Michel Bras (Frantzia) eta Narda Lepes (Argentina).

 

Haiek ere Basque Culinary World Prize-ko epaimahaia osatzen dute, eta haien esku egongo da sukaldarien ekimen eraldatzaileak saritzen dituen sari honen irabazlearen izena erabaki eta iragartzea.

TALAIA GOe-n

 

Euskadin, bost mendean baino gehiagoan eraiki da itsas identitatea. Arrantza-tradizioari, nabigazioaren alorreko berrikuntzari eta itsasoari lotutako sukaldaritza-ondareari esker, etorkizunerako begirada hori ordezkatzen duen erreferente historiko eta gastronomiko bilakatu da.

 

Basque Culinary Centerren Nazioarteko Kontseiluaren bileraren esparruan eta GOe –  Gastronomy Open Ecosystemen inaugurazioarekin batera, Talaia izeneko ekitaldi ireki bat egingo da.

 

Dakigunez, "talaiak" behatokiak dira: horizontea zaintzeko eta ingurunean gertatzen diren mugimenduak aurresateko erabiltzen diren toki garaiak. GOe – Gastronomy Open Ecosystemen testuinguruan, izen horrek ondo baino hobeto adierazten du ekimenaren helburua: itsasoari lotutako gastronomiaren orainari eta etorkizunari behatzeko eta horren guztiaren inguruko gogoeta kolektiboa egiteko gunea izatea. Ezagutzak partekatzeko, aukerak detektatzeko eta norabide berriak aurkitzeko —kostaldeko talaietatik egiten den bezala— espazio bat izango da, eredu jasangarri, nutritibo eta berritzaileagoetara heltzeko.

 

Ezagutza partekatzea —berrikuntza teknologikoak, jakintza tradizionalak, etab.—  funtsezkoa izango da etorkizun zaporetsu, nutritibo eta jasangarriagoak imajinatzeko. Aukera paregabea izango da aurrerapenak egiteko arrantza jasangarrian, akuikultura birsortzailean, kultibo berritzaileetan, antzinako jakintzak berreskuratzen, I+G-ko ekimenetan, sektore publikoaren eta pribatuaren arteko aliantzetan eta kontsumitzaileek itsasoarekiko harreman kontzienteagoan izango duten paper aktiboan.

 

Hitzordua baliagarria izango da, halaber, sektorearen etorkizunari aurre egiteko gastronomiaren nonahikotasuna azpimarratuz eta gaur egungo eskaerekin konektatuz, Kontseiluko kideak, chefak eta sektoreko adituak protagonista izango dituzten hitzaldi eta mahai-inguruen bidez. Hala nola Dan Saladino kazetari britainiarra, Ángel León chefa, Juan Marín biologoa (Aponiente), Albaolako Xabier Agote artisaua, John Regefalk chefa (GOe Tech Center), Ander Izagirre kazetari eta idazlea, Antonio Muiños (algei elikagai gisa balioa eman zien enpresari eta aitzindari galiziarra) eta Sandra Piñeiro entrenatzaile, berregokitzaile eta iraupen-kirolaria. 

 

Joan Roca Nazioarteko Batzordeko presidenteak dioenez, “Beti da atsegina Donostiara itzultzea, baina, oraingoan, are ilusio handiagoa egiten du Talaiaren testuinguruan etortzeak, itsasoari identitate-, inspirazio- eta etorkizun-iturri gisa begiratzen dion topagunea baita. Euskal Herria erreferente gastronomikoa da mundu mailan, eta kultura aberatsa, itsas produktu bikainak eta talentuz eta proiektu berritzailez betetako ekosistema bat du. Gure ardura da, beste behin ere, nazioarteko panorama gastronomikoa garatzen eta eztabaida sortzen laguntzea. Ezagutza partekatzea —berrikuntza teknologikoak, sukaldaritzako tradizioak, etab.—  funtsezkoa izango da etorkizun zaporetsu, nutritibo eta jasangarriagoak imajinatzeko. Talaiak aukera paregabea emango digu aurrerapenak egiteko arrantza jasangarrian, akuikultura birsortzailean, kultibo berritzaileetan, antzinako jakintzak berreskuratzen eta I+G-ko ekimenetan, eta, halaber, sektore publikoaren eta pribatuaren arteko aliantzak bultzatuko ditu eta kontsumitzaileek itsasoarekiko harreman kontzienteagoa izaten lagunduko du.”

 

Bestalde, Joxe Mari Aizega ekimenaren anfitrioiak azaldu duenez, “Basque Culinary Centerren Nazioarteko Kontseiluaren bilera agenda oso bereziarekin itzuliko da Donostiara urrian. Hiru egunez, jarduera garrantzitsuak egingo ditugu; besteak beste, GOe – Gastronomy Open Ecosystem inauguratuko dugu, hamargarren Basque Culinary World Prize sariaren irabazlea hautatuko dugu, gure kontseiluaren urteko bilera egingo dugu, eta, nola ez, jendearentzat irekitako jardunaldi bat egingo dugu. Talaiak itsasoan jarriko du fokua, bai eta gastronomiak haren inguruan dituen erronka eta aukeretan ere. Asko pozten gaitu chef-talde hau eta mundu mailan erreferenteak diren profesional hauek gure hirian berriro elkartzeak, eta, gainera, ikerketarako, berrikuntzarako eta ekintzailetzarako prestatutako gune batean izateak. Aukera bikaina izango da esperientziak partekatzeko, aukerak detektatzeko eta, batez ere, gastronomiaren etorkizunaz eta gizartean duen inpaktuaz gogoeta egiteko guztion artean.” 

 

HAMABOSGARREN TOPAGUNE GASTRONOMIKOA

2025ean, Nazioarteko Kontseiluaren hamabosgarren bilera egingo du Basque Culinary Centerrek parekorik gabeko testuinguru honetan. Modu horretan, jarraitutasuna emango zaie aurreko hamalau urteetan nazioarteko gastronomiaren erreferenteak diren tokietan (Lima, Tokio, New York, Mexiko Hiria, Modena, San Frantzisko eta Girona) egindako bilera eta ekitaldiei. Izan ere, jasangarritasunaren, biodibertsitatearen, talentuaren eta sektore gastronomikoaren eraldaketaren inguruan eztabaidatu zen toki horietan hainbat jardunalditan, diziplina anitzeko ikuspegiarekin eta etorkizuna kontuan hartuz, betiere.

Mirespenez eta gastronomia eta itsasoarekin duen lotura sakona garatzen lagunduko duten trukeak sortzeko gogoa oinarritzat hartuta,Basque Culinary Center-eko Nazioarteko Batzordeak urteko bilera egingo du Donostiako eta Gipuzkoako hainbat gune arakatuz. Ibilbide honetan, ezagutza elikatzea, eztabaida-korronteak piztea eta etorkizunerako ibilbide partekatuak marraztea izango dira helburu.

Hiru egunez, urriaren 20tik 22ra, Batzordeko kideek hainbat jarduera burutuko dituzte, itsasoari eta tokiko gastronomiari estu lotutako tradizioak, ekoizleak, ideiak eta eraldaketak uztartuz. Gainera, GOe – Gastronomy Open Ecosystem inaugurazioan parte hartuko dute, Batzordeko bileraren parte izango dira, eta Basque Culinary World Prize sariko 10.irabazlea hautatuko dute. Eusko Jaurlaritzak eta Basque Culinary Centerrek sortutako saria den hori “Gastronomiaren Nobel saritzat” dute hedabideek, eta nazioarteko ospe handiko akademiko eta adituen laguntza du.    

Aurten hirugarren aldiz egingo da Donostian Basque Culinary Centerren Nazioarteko Kontseiluaren bilera. Lehena 2010ean egin zen, Aholku Batzordea eratu zen urtean, eta gastronomiaren sektorean mundu mailan ospe handia duten profesionalak elkartu zituen; besteak beste, Ferran Adrià, René Redzepi, Yukio Hattori, Massimo Bottura, Dan Barber, Alex Atala eta Heston Blumenthal, bai eta gaur egungo kideetako batzuk ere. Kontseilua 2015ean elkartu zen bigarrenez Donostian, une adierazgarri batean: Gastronomia Zientzien Fakultateko Gastronomiako eta Sukaldaritza Arteetako lehen graduazioa. Enrique Olvera eta Joan Roca, gaur egungo presidentea, ere han izan ziren.    
 

Ekitaldia Basque Culinary Centerrek antolatu du, NOBU San Sebastián  izan da Nazioarteko Kontseiluaren hotel ofiziala eta COVAP, Fagor Professional, Mahou San Miguel, Martiko, Arcos, Aquanaria eta Belcolade izan dira erakunde laguntzaileak.  

 

Programaren eta edukien inguruko berriak https://donostia2025.bculinary.com/ helbidean eguneratuko dira, eta Basque Culinary Centerren eta erakunde parte-hartzaileen sare sozialetan argitaratuko dira.  

 

BASQUE CULINARY CENTERREN NAZIOARTEKO KONTSEILUA

Basque Culinary Centerren Nazioarteko Kontseilua (gaur egungo sukaldari garrantzitsuenetariko batzuek osatua) funtsezko egitura bat da, eta haren erantzukizunak dira, besteak beste, Basque Culinary Centerren proiektu estrategikoetan aholku ematea, ahaleginak orientatzea, aukerak identifikatzen laguntzea eta gastronomian aurrerapausoak ekarriko dituzten eztabaida- eta ekintza-agertokiak irekitzea. Munduko hainbat tokitan bizi dituzten kezkak eta ikuspegiak ordezkatzen dituzte kontseiluko kideek.

 

Laguntzaileen artean maila handiko pertsonen parte-hartzeak dakarren zorteaz jabetuta, Basque Culinary Centerren asmoa da loturak sendotzea elkarrekiko aliantza biderkatzaileak sortzeko. Hori lortzeko, kideak gastronomiarako esanguratsuak diren lekuetan urtean behin biltzeko asmoa du. 

 

Honako hauek izan ziren fundatzaileak: Ferran Adrià (Espainia), Joan Roca (Espainia), Gastón Acurio (Perú), Massimo Bottura (Italia), Michel Bras (Frantzia), René Redzepi (Danimarka), Heston Blumenthal (Erresuma Batua), Alex Atala (Brasil), Dan Barber (AEB) eta Yukio Hattori (Japonia). Denboran zehar, honako hauek gehitu zaizkie: Enrique Olvera (Mexiko), Mauro Colagreco (Argentina/Frantzia), Manu Buffara (Brasil), Yoshihiro Narisawa (Japonia), Trine Hahnemann (Danimarka), Dominique Crenn (Frantzia/AEB), Pia León (Perú), Josh Niland (Australia), Narda Lepes (Argentina), Elena Reigadas (Mexiko) eta Ton Tassanakajohn (Thailandia).