EDA Drinks & Wine Campusek urrats erabakigarri bat egin du edarien panorama birdefinitzeko bidean: Drinks Summit topaketaren hirugarren edizioa, hain zuzen. Hitzordu hori jada ezinbesteko bilakatu da ekosistema likidoarentzat nazioartean. Aurten ere, ekitaldiak sektore osoa elkartu du, eta, gainera, eraldaketa sakon baten ispilu eta katalizatzaile gisa jardun du: bidea zabaldu diete berrikuntza-logika berriei, ideiak bizkortzen, kategoriak batzen eta elkarrekin bizitzen, eta edarien arteko muga tradizionalak lausotzen ari diren garaiotan.

Bi jardunaldi trinkotan —lehenbizikoa atzo izan zen Gasteizen, eta bigarrena, berriz, gaur Donostian—, EDA Drinks Summitek 100 profesional, marka, ekoizle, banatzaile eta goi-mailako eragile estrategiko pasatxo bildu ditu, hala nola Lars Williams eta Rodrigo Nincao (Empirical - New York), Jogile Bulavaite (Alchemist - Kopenhage), Tomás Ucha (DiverXO - Madril), Mónica Berg (Tayer + Elementary - Londres), François Monti (50 Best Bars, Espainia eta Portugalgo presidentea), Elvira Aldaz (sake eta shochuan espezializaturiko kazetari eta dibulgatzailea), Alejandro Acosta (Muri Drinks - Kopenhage) edo Kristell Monot (Mugaritz - Errenteria). Hori horrela, sektoreko mugarri gisa finkatu da topaketa, eta inoiz baino argiago azpimarratu du beharrezkoa dela edarien unibertsoaren etorkizuna kolektiboki pentsatzea eta hurrengo etapako gakoak elkarlanetik abiatuta eraikitzea.

Drinks Summit 2026 premisa baten inguruan aritu da, zeinak ederki laburbiltzen baitu sektoreak bizi duen paradigma-aldaketa: garrantzitsuena jada ez da edari batek alkohola duen ala ez, baizik eta egiaz goxoa izatea. What Does Drinking Delicious Mean? leloarekin, topaketak edanari buruzko begirada zabala, garaikidea eta biziki gogoetatsua proposatu du, edatea gaur unibertso likidoaren orainarekin —eta etorkizunarekin— erlazionatzeko jarrera, filosofia eta modu gisa ulertzen baita.

Bi jardunaldietan zehar, programak egungo kontsumoa birdefinitzen ari diren printzipioak aztertu ditu: gero eta aniztasun handiagoa duen merkatu bat, zeinean elkarrekin ageri baitira edari alkoholdunak, alkoholik gabeak, low eta craft proposamenak, tradizionalak edo are guztiz berritzaileak diren beste zenbait; bikaintasun teknikoaren aldeko apustu irmoa; eta edariak pertsonekin, lurraldeekin, kulturarekin eta haien momentuekin uztartzen dituen ikuspegia. Topaketak sektorearen inklusibotasuna ere azpimarratu du, kontuan izanik etiketarik gabeko kontsumo baterantz ari dela egiten; horretaz gainera, nabarmendu du asmoan, erantzukizunean eta inpaktuan oinarritutako ikuspegi kontzientea ere. Hori guztia espiritu berritzailez eta begirada jasangarriz jantzirik aurkeztu dute, eta indarturik gelditu da errespetu handiagoko prozesuekiko eta etorkizunarekin lerrokatutako ekoizpen-ereduekiko konpromiso kolektiboa.

 

Vitoria-Gasteiz: Zientzia, sormena eta dastatze-saioak edarien etorkizuna ulertzeko

Atzo, Gasteizko Círculo Vitoriano zentroan egin zen EDA Drinks Summit 2026 ekitaldiaren lehen jardunaldia. Saio hartan, gorabidean dauden egitasmoak eta profesionalak elkartu ziren, eta aztergai izan zituzten zientzian, berrikuntzan eta ongizatean oinarrituta edarien mundua eraldatzen ari diren joerak. Jardunaldia partaidetza-giroan egin zen; hala, publikoak bilakaera betean dagoen sektore bat deskubritu eta dastatu ahal izan zuen, baita hari buruz hausnartu ere. Bilakaera horretan, sormenak, jakintzak eta osasunak definitzen dute edarien etorkizuna.

Ekitaldia EDA Drinks & Wine Campuseko zuzendari Elisa Ucarren hitzekin hasi zen. Harekin batera izan ziren Noemí Agirre Arabako Nekazaritzako foru-diputatua eta Nora Beltrán de Otalora Eusko Jaurlaritzako Elikagaien Kalitate eta Sustapeneko zuzendaria. Jarraian, Monserrat A. Jasso GOe Tech Centerreko ikertzaileak hitz egin zuen, eta edari emergenteen sorkuntzari eta sektorearen norabidea markatzen ari diren prozesuei buruzko hurbilketa zientifikoa eskaini zuen. Bere hitzaldian edari funtzional gisa ulertzen dugun hori zer den azaldu zuen, baita herrialdearen arabera nola kontzeptu honen definizioa aldatu egiten den eta zergatik, gaur egun, ez dagoen haren inguruan nazioarteko adostasunik. Horrez gain, arloan egindako ikerketen hazkundea nabarmendu zuen, GOe Tech Center-ek garatutako hainbat produktu funtzional aurkeztuz. Edari funtzionalen etorkizuna ez dela gehiago formulatzea, baizik eta gehiago frogatzea azpmirrarratu zuen ere, hau da, haien onurak zientifikoki balioztatzea eta sektoreak sinesgarritasuenz aurrera egin ahal izateko oinarri sendo bat eraikitzea.

Ondoren, Alejandro Acosta Kopenhageko Muri Drinks etxeko edari-garatzaileak “Liquid Gastronomy from Copenhagen” (Gastronomia likidoa Kopenhagetik) tailerra aurkeztu zuen, eta gastronomia likidoaren inguruan duten filosofia eta ikuspegi sortzailea partekatu zituen. Azaldu zuenez, Muri Drinks-en urban blendery izeneko eredua garatzea erabaki dute, lau zutabetan oinarrituta: osagaien hautaketa, ikuspegi teknikoa, hartzidura eta blending-a, konplexutasuna bilatuz. “Zaporea eta usaina dira edariek emozioak transmititzeko duten oinarri nagusia, eta kasu honetan alkohola alde batera utzita egin dugu, osagai naturaletan oinarrituta, aldi berean eskuragarria eta kontsumo-eredu berrietara egokitua”, azaldu zuen.

Bestalde, Eduardo Riaza Mahou San Miguel etxeko Produktu Berriak Egiteko I+G+Bko teknikariak Refeel aurkeztu zuen, osagai % 100 naturalekin egindako edari energetikoa, kaloria gutxikoa eta zapore tropikal eta zitrikoa duena. Gaur egun merkatuan aurkitu daitezkeen edari energetikoak ordekatzeko aukera osasuntsuago bat. 

Hurrengo dastatze-saioa “Destilando Terroir” izan zen, Doniene Gorrondona etxeko Itziar Isaustik zuzendua. Gerturatu ziren entzuleek,  lurraldearen izaera artisau-tekniken eta teknika garaikideen bidez adierazten duten destilatuak arakatu zituzten. Mahatsaren azalaren baliaketa, mahats bakar batekin egindako zapakina… ia galduta zegoen tradizio bat berreskuratzen duen prozesu zehatza da, gaur egun, Doniene Gorrondona nortasun propioa duten destilatuen ekoizpena bizirik mantentzen duten Euskadiko upategi gutxietako bat bihurtzen duena.

 

Bestalde, Curro Polok (AMA Pet & Nat), haren “natural sparkling tea” produktua sortzeko prozesua azaldu ondoren, edari hartzituen potentzialean oinarritutako dastatze-saio bat gidatu zuen. Horrez gain, “The Rise of Fermented Fine Bubbles” hitzaldiarekin (Burbuila fin hartzituen gorakada), agerian gelditu zen gero eta presentzia handiagoa dutela goi-mailako proposamen gastronomikoetan.

Jardunaldia amaitzeko, Eduardo Vidal Pérezek Komvida aurkeztu zuen, “zaintzen duen zaporea eta sentitzen den ongizatea”. Bere hitzaldian, kombucha nabarmendu zuen alternatiba osasungarri eta kontziente gisa, eta erakutsi zuen edari goxo batekin disfrutatzeak modu informatuan eta komunitatean gozatzea ere esan nahi duela, landa-munduko garapena bultzatuz.

Donostia: bizikidetasunean oinarrituta idazten da etorkizuna

Gaur, Basque Culinary Centerren izan da Drinks Summit 2026 ekimenaren bigarren jardunaldia. Saioa D.E.L.I.C.I.O.U.S. kontzeptuaren aurkezpenarekin hasi da, bai eta edarien etorkizunari eta haien arteko bizikidetzari buruzko hausnarketa bateratuarekin ere, ardatz kontzeptual horrek gidatu baitu gaurko programazio osoa.

Eusko Jaurlaritzako Elikagai Politika eta Industriako zuzendari Iker Iglesiasek eta Basque Culinary Centerren zuzendari Joxe Mari Aizegak ongietorria egin ondoren, New Yorkeko Empirical Spirits etxeko Lars Williams eta Rodrigo Nincaok parte hartu dute. “Spirits for the Curious” (Jakin-mina dutenentzako edariak) hitzaldiaren bidez, legamien hartziduran, destilazioan, zientzian eta zaporeari aplikatutako berrikuntza erradikalean sakondu dute, eta erakutsi dute esperimentazioak aukera berriak sor ditzakeela unibertso likidoan, azken finean, “zaporeak memoriarekin batzen dira, eta munduko pertsonak batzen dituzte ere”.

Topaketak nazioarteko abangoardia gastronomikoari begira jarraitu du: Jogile Bulavaite Kopenhageko Alchemist etxeko Front of House edo harreraguneko arduradunarekin. Hala, Danimarkako jatetxe horretan (Rasmus Munk da burua, bi Michelin izar ditu eta munduko onenetako bat da) NoLo sailean egiten duten lanari buruz hitz egin du, baita sukaldaritza-esperientzia zabaltzen duten mugarik gabeko uztarketak sortzeko moduari buruz ere. Azpimarratu duen bezala, jatetxea ireki zenetik, maridajeen bilakaera ez da soilik ardoan oinarritu, baita harmoniak NoLo proposamenetara zabaltzean, hala nola ‘botanika’ maridajera, eta orain, 2025ean, neurrira egindako maridajeetara, koktelak, garagardoa, whiskya eta tea barne. Azpimarratu duenez, “salmentak aztertuz gero, %45a NoLo maridajeei dagokie, gure jatetxearentzako hazkunde oso esanguratsua”.

Sormenak protagonista izan da berriz ere Tomás Ucharen eskutik (DiverXO). Madrilgo jatetxearen imajinario likidora eta berrikuntza ulertzeko duen modura hurbilketa bat egin du, hausturan eta ustekabean oinarritua. “Metamorfosia” proiektuaz hitz du: beharretik sortutako proiektua, non ustekabearen faktorea edalontzi bakoitzean agertzen den. “Ez da alkoholik gabeko munduaren bilakaera bat, ereduaren haustura bat baizik. Metamorfosia sukalde likidoaren sistema bat da, ez sukalde solidoaren hierarkia jarraitzen duen maridaje bat”. Gainera, guztiz alkoholik gabeko menu bat da, azukrea saihestu eta plazera zaporean oinarrituta ulertzen duena. Metamorfosia diziplina anitzen sintesia da, elkarrekin orekan lan eginez eta ezagutzak integratuz. Azken finean, hizkuntza gastronomiko berri bat da. 

Dastatze-atsedenaldian, bertaratutakoek proiektu eta markek aurkeztutako proposamenak probatu ahal izan dituzte, bereziki diseinatutako erakusketa gune batean. Aukeran izan dituzte NoLo edariei eskainitako standak —AMA Brewery, Muri Drinks, Suka eta Komvida bertan zirela—, Mahou San Miguel garagardoa, Angelita Madriden edariak, bai eta destilatuak eta spiritak ere —Gorrondona txakolina eta Basque Moonshiners, kasurako—. Ibilbide sentsorial horri esker, bertatik bertara ezagutu dituzte gastronomiaren eta edarien panorama birdefinitzen ari diren produktu berritzaileak, elaborazio-prozesu bereziak eta joera emergenteak.

Jarraian, Monica Bergen tailerra izan da: 2019ko zerbitzari onenak eta Tayēr + Elementary etxearen jabekideak “The Invisible Structure: Designing Coexistence, Shaping Spaces” (Egitura ikusezina: bizikidetza diseinatzea, espazioak itxuratzea) hitzaldia eman du. Saio horretan, koexistentzia, sormena eta pertsonen eta espazioen arteko interakzioa sustatzen duten esperientzia likidoak diseinatzeko moduari heldu dio.

Ondoren, Mahou San Miguelen Berrikuntzako zuzendari Toni Ortizek hitz egin du; garagardo-markaren prozesu berritzaileak azaltzea gain, nola etengabe aldatzen ari  diren kotsumitzailetara egokitutako proposamen berriak garatzen dituzten azaldu du. Horren adibide da Refeel, Gasteizen aurkeztutako edari energetikoen produktu ordekatzaile berria,  edari energetikoen onura berak eskaintzen dituena. 

Jardunaldia amaitzeko, mahai-inguru bat egin da, “abian” diren edarien etorkizuna eta baterako existentzia hizpide hartuta. Gero, elkarrizketa aberasgarri baten protagonista izan dira François Monti, 50 Best Bars Espainia eta Portugalgo presidentea, Mario Villalón, Angelita Madriden jabea, Kristell Monot, Mugaritzeko sommelier-burua, eta Elvira Aldaz, sakean eta shochuan espezializatutako kazetaria. Saio horretan, mahai gainean jarri dituzte erronkak, aukerak eta bide posibleak, edariek etorkizun askotarikoagoa, jasangarriagoa eta kolaboratiboagoa izan dezaten.

 

Drinks Summit 2026k agerian utzi du sektorea mapa berri bat marrazten ari dela: lurralde likido horretan, mugak leuntzen ari dira eta kategoriek elkarrizketan dihardute, eta sormena, berriz, aniztasun, jasangarritasun eta esperientzia handiagoz kontsumitzeko moduetarantz ari da egiten. Jardunaldi hauek gidatu dituen begirada garaikideak baieztatzen du edarien etorkizuna bizikidetzan, jakin-minean eta erantzukizun partekatuan oinarrituta eraikitzen dela.

Bide horretan, EDA Drinks & Wine Campusek ezinbesteko leku gisa jarraitzen du sendotzen, zer datorren irudikatzeko. Espazio horretan, bat egiten dute pentsamendu kritikoak, berrikuntzak eta aniztasunak, eta ekosistema irekiago eta kontzienteago bat bultzatzen dute, hobeto prestatua unibertso likidoaren aro berria definitzen duten erronkei eta aukerei aurre egiteko.

Ekimen honek Eusko Jaurlaritzako Elikadura, Landa Garapen, Nekazaritza eta Arrantza Sailaren eta Arabako Foru Aldundiaren laguntza instituzionala izan du, baita Mahou San Miguelen babesa ere.