Basque Culinary Centerrek Nazioarteko Aholku Batzorde Zientifiko bat eratu du, eta urrats erabakigarria egin du horrela bikaintasun zientifikorako bidean. Organo hori ikerketa-estrategia sendotzeko eta sukaldaritza-berrikuntzaren kalitatea eta garrantzia bermatzeko diseinatuta dago, eta, haren bidez, mundu osoko gastronomiaren ezagutzan aurrera egiteko konpromisoa sendotu du erakundeak.

Hazkundea, kuantitatiboa ez ezik —master- eta doktoretza-programa berriak, GOe Tech Center zentro teknologiko gastronomikoa—, kualitatiboa ere izan da, goi-mailako diziplina anitzeko taldea osatu baitu. Hori guztia kontuan izanik, gidaritza aditua behar da ikerketan aurrera egiten jarraitzeko. Basque Culinary Center Fundazioaren Estatutuetan aurreikusita zegoen jada Aholku Batzorde Zientifiko hori, eta orain, beraz, gidaritza-prozesu horretan aholku emateko eta erakundea gastronomiaren abangoardia zientifiko eta teknologikoan mantentzen dela bermatzeko sortu da.

Nazioarteko Aholku Batzorde Zientifikoa funtsezkoa izango da lehentasunezko ikerketa-arloak zehazteko, proiektu eta politika instituzionalak berrikusteko eta kalitate zientifikoko estandar gorenak bermatzeko. Gainera, diziplinarteko eta nazioarteko lankidetza sustatuko du, eta, horretarako, Basque Culinary Centerrek komunitate zientifikoarekin, elikagaien industriarekin eta sektore gastronomiko globalarekin dituen loturak indartuko ditu.

Batzorde Zientifikoak funtsezko eginkizuna beteko du Basque Culinary Centerren garapenean eta orientazio estrategikoan. Batzordearen zereginen barruan sartzen da, besteak beste, aholkularitza zientifiko eta estrategikoa ematea. Bide horretan, lehentasunezko ikerketa-ildoak zehaztuko ditu, proposamenak berrikusiko, metodologiak bideratuko eta erronka berriak planteatuko ditu, bai enpresari dagokionez, bai Basque Culinary Centerren GOe Tech Center gastronomiako zentro teknologikoari dagokionez. Gainera, erakunde-politikak ebaluatu eta horiei buruz aholkatzen du, etikarekin, argitalpenarekin, lankidetzarekin eta garapen akademiko zein teknikoarekin lotutako arloetan,Gastronomia Zientzien Fakultatearen jarduera zientifikoa bultzatzen lagunduz, batez ere doktorego programa indartzeko.

Batzordeak ikerketen kalitatea eta inpaktua bermatzen ere lagunduko du; horretarako, etengabeko hobekuntzak proposatuko ditu, eta bikaintasun zientifikoa sustatuko. Era berean, diziplinarteko eta nazioarteko lankidetza bultzatuko ditu, diziplinen arteko loturak eta erreferente globalekiko harremanak sustatuz, eta zentroaren irismen zientifikoa eta teknologikoa zabaltzea dakar horrek ezinbestez. Azkenik, lotura estrategikoak ezarriko ditu komunitate zientifikoarekin, erakundeekin, gobernuekin eta enpresekin, eta bide horretan, ezagutzaren transferentzia eta berrikuntza sustatuko ditu, betiere GOe ekosistemaren erronkekin bat etorrita.

Batzordea bi urtean behin bilduko da aurrez aurre, aurrerapenak ebaluatzeko eta lehentasunak zehazteko. Horrez gain, bilera birtualak ere egingo ditu aldizka. Kideak txandakatu egingo dira, ezarritako protokoloen arabera, eta beren erantzukizunen araberako konpentsazioa jasoko dute.

Aholku Batzorde Zientifikoko kideak

Batzorde Zientifikoko kideak nazioartean ospe handia duten arlo hauetako profesionalak dira: elikagaien zientzia eta teknologia, nutrizioa, mikrobiologia, elikagaien segurtasuna, gastronomia, sukaldaritza-berrikuntza, jasangarritasuna, elikaduraren ekonomia, biokimika, bioteknologia eta ikerketaren kudeaketa. Hainbat herrialdetatik etorritakoak dira batzordekideak, eta ikuspegi globala eta diziplina anitzekoa dakarte. Eta horrek sendotu egiten du Basque Culinary Centerren ikerketa, ezagutzaren transferentzia eta berrikuntza.

Ole Mouritsen. Fisikaria eta Kopenhageko Unibertsitateko irakaslea, gastrofisikan eta sukaldaritza-berrikuntzan espezializatua. Liburu eta artikulu zientifiko ugari idatzi ditu elikagaien zientziari, zaporeari (bereziki umamiari) eta itsas elikagaiei buruz. Danimarkako Gastronomia Akademiako buru da, eta Taste for Life zentroa zuzentzen du.

Pia Sörensen. Harvardeko irakaslea eta Zientzia eta Sukaldaritza programaren zuzendaria. Elikagai-hartziduretan eta hezkuntza zientifikoan aditua, zientziaren eta gastronomiaren arteko harremana jorratzen duten zenbait libururen eta onlineko ikastaroren egilea.

Suzanne Devkota. Cedars-Sinaiko irakasle elkartua, hesteetako mikrobioma ikertzen du, bai eta mikrobioma horrek hanturazko gaixotasunetan eta gaixotasun metabolikoetan duen eragina ere. Bere lanak ikerketa klinikoa eta oinarrizkoa uztartzen ditu, dietak hesteetako osasunean nola eragiten duen hobeto ulertzeko.

Rob Dunn. Biologo eta irakaslea Ipar Carolinako Estatuko Unibertsitatean, herritarren zientziaren arloan egindako lanagatik da ezaguna. Giza gorputzeko eta etxeko biodibertsitate mikrobianoa aztertzen du, eta baso tropikalen kontserbazioan lan egin du.

Hiroaki Kitano. Sony AI-ko CEOa eta Okinawako Zientzia eta Teknologia Institutuko irakaslea. Adimen artifizialaren eta robotikaren alorreko liderra, nazioarteko zenbait sari jaso ditu, eta RoboCup Federazioaren sortzaile eta presidentea.

Jean-Xavier Guinard. Kaliforniako Unibertsitateko (Davis) irakaslea, zientzia sentsorialean eta kontsumitzailearen onarpenean espezializatua. Kalitate sentsoriala eta aldaketa dietetikoa hobetzeko estrategiak ikertzen ditu, eta, horrez gain, enpresei eta nazioarteko agentziei aholku ematen die.

Katie Stebbins. Tufts Unibertsitateko Food & Nutrition Innovation Institute-eko zuzendari exekutiboa eta berrikuntza teknologikoan eta garapen ekonomikoan aditua. Teknologiaren eta berrikuntzaren arloko ekimenak gidatu ditu Massachusettsen, eta hiri postindustrialen sustatzailea da.

Paula Varela. Ikertzaile seniorra Nofima ikerketa-institutuan eta irakaslea Norvegiako Bizitza Zientzien Unibertsitatean; aditua da kontsumitzailearen portaera (bereziki populazio bereziak) ulertzeko metodologietan eta dieta jasangarriagoetarako trantsizioan.

Iñaki Martínez de Albéniz. Soziologian doktorea eta Euskal Herriko Unibertsitateko katedraduna, gastronomia ikuspegi sozial eta kulturaletik aztertzen espezializatua. Mugaritz jatetxearen ohiko kolaboratzailea eta gastronomia garaikideari buruzko zenbait argitalpenen egilea.

María José Sanz. Atmosferaren kutsaduran, klima-aldaketan eta ziklo biogeokimikoetan aditua den ekofisiologoa. Basque Centre for Climate Changeko zuzendari exekutiboa eta ingurumen- eta klima-politiken nazioarteko aholkularia.

Line Gordon. Stockholmeko Erresilientzia Zentroko zuzendaria; esperientzia handia du jasangarritasunaren eta elikadura-sistemen arloetan. Elikadura-eraldaketari eta ingurumen-erresilientziari buruzko proiektuen buru da, eta nazioarteko hainbat kontseilutan parte hartzen du.

 

Batzorde Zientifikoak modu dinamiko eta parte-hartzailean lan egingo du, eta, hasteko, banakako bilerak egingo ditu. Bilera horietan, kide bakoitzak informazioa emango du bere expertise eremutik, eta ikerketak gastronomian eta, azken batean, gizartean nola eragin dezakeen aztertuko du. Hartu-eman horietatik abiatuta, lan-azpitaldeak antolatuko dira, eta aldizkako topaketak egingo dira, bai birtualak, bai presentzialak GOe – Gastronomy Open Ecosystem-en, workshop, ikasleekiko erronkak ikasleekin eta jarduerekin. Prozesu horri esker, lehentasunezko ikerketa-ildoak definitu ahal izango dira, eta nazioarteko proiektuak bideratu, gastronomia 360 ikuspegi integral batetik landuz.

Informazio gehiago, hemen: https://www.bculinary.com/eu/comite-cientifico