Fagor Group enpresa Basque Culinary Center proiektuko lehen kidea da, Fundazio horren patronatuarekin bat egitean. BCulinaryko zuzendari eta Mondragon Unibertsitateko erretoreordeak, Joxe Mari Aizegak, eta Fagor Groupeko zuzendari nagusiak, Txema Gisasolak, Donostian burutu duten gaurko sinadura-ekitaldiak ondotxo adierazten du Basque Culinaryren apustua: gastronomia-zientziekin zerikusia duten eragileen sinergiak elkartzearen aldekoa, alegia. Horrela, hasiera batean lau urteko hitzarmena sinatu da, 2010eko urtarrilaren 1etik indarrean dagoena. Hitzarmen horrek, BCulinaryk I+G+b elkarlanean garatzeko duen helburuari erantzuten dio, ikerketa-eremu desberdinetan lanean diharduten eragileekin batera proiektuak bultzatzeko asmoa baitu.